បើកកិច្ចប្រជុំសហភាពប្រៃសណីយ៍តំបន់អាស៊ី-ប៉ាស៊ីហ្វិក ២០១៨
កប.អនឡាញ - នាព្រឹកថ្ងៃទី ២៥ មិថុនា នៅទីក្រុងដាណាំង (ភាគកណ្តាលវៀតណាម) ក្រសួងព័ត៌មាន និងគមនាគមន៍វៀតណាម បានសហការជាមួយសហភាពប្រៃសណីយ៍តំបន់អាស៊ី ប៉ាស៊ី-ហ្វិក រៀបចំកិច្ចប្រជុំនៃក្រុមប្រឹក្សាប្រតិបត្ដិរបស់សហភាពប្រៃសណីយ៍តំបន់អាស៊ី- ប៉ាស៊ីហ្វិក (APPU-EC 2018)។
អញ្ជើញចូលរួមសន្និសីទមានប្រតិភូ ១២២ នាក់មកពីប្រទេសចំនួន ២២ ជាសមាជិករបស់សហភាព APPU និងអង្គការអន្ដរជាតិ ព្រមទាំងមានវត្ដមានពីលោកអគ្គលេខាធិការ APPU និងអគ្គនាយកសហភាពប្រៃសណីយ៍ពិភពលោក(UPU) ផងដែរ។
|
|
លោក Nguyen Minh Hong អនុរដ្ឋមន្ដ្រីក្រសួងព័ត៌មាននិងគមនាគមន៍វៀតណាមថ្លែងនៅកិច្ចប្រជុំ (រូបថត៖ baochinhphu.vn) |
អង្គប្រជុំបានពិភាក្សាលើការផ្លាស់ថ្មី និងលើកកម្ពស់ប្រសិទ្ធភាពរបស់ APPU គោលនយោបាយអភិវឌ្ឍន៍នៃសេវាប្រៃសណីយ៍ កាលានុវត្ដភាព និងបញ្ហាប្រឈមក្នុងការធ្វើអាជីវកម្ម និងអភិវឌ្ឍន៍ពាណិជ្ជកម្មអេឡិចត្រូនិច។ ក្នុងក្របខ័ណ្ឌនៃកិច្ចប្រជុំនេះ ខ្លឹមសារ និងជំនាញប្រៃសណីយ៍ត្រូវបានលើកយកពិភាក្សានៅសម័យប្រជុំនៃបណ្ដាក្រុមការងារ ដើម្បីបង្កើនការសហការនៅតំបន់ ព្រមទាំងពិភាក្សាអំពីកិច្ចសហប្រតិបត្ដិការក្នុងក្របខ័ណ្ឌនៃសហភាពប្រៃសណីយ៍ពិភពលោក UPU ផងដែរ ៕
បកប្រែដោយ Pham Diep