ប្រតិបត្តិការជួយសង្គ្រោះក្មេងៗថៃចេញពីរូងភ្នំ Tham Luang ប្រកបដោយជោគជ័យហើយ
កប.អនឡាញ - ប្រតិបត្ដិការជួយសង្គ្រោះដែលមិនធ្លាប់មានពីមុនមកនៅប្រទេសថៃក្នុងរយៈពេលប៉ុន្មានថ្ងៃកន្លងមកនេះបានបញ្ចប់ជាស្ថាពរហើយ ក្មេងប្រុសទាំង១២នាក់ និងគ្រូបង្វឹកត្រូវបានជួយសង្គ្រោះចេញពីរូងភ្នំដោយសុវត្ថិភាព។
|
|
ប៉ូលីស និងទាហានយាមការពារឧទ្ធម្ភាគចក្រសម្រាប់ដឹកជញ្ចូនក្មេងៗដែលបានយកចេញពីរូងភ្នំទៅមន្ទីពេទ្យ (រូបថត៖ AFP) |
យោងតាមទីភ្នាក់ងារព័ត៌មានរ៉យទ័រ យុទ្ធនាការជួយសង្គ្រោះលើកទី៣ ត្រូវបានចាប់ផ្តើមជាផ្លូវការនៅម៉ោង ៩ និង ៣០ នាទីព្រឹកថ្ងៃទី ១០ ខែកក្កដា ដើម្បីនាំសមាជិក ៥ នាក់ទៀតចេញពីរូងភ្នំ។ មុននេះពីរថ្ងៃគឺនៅថ្ងៃទី ៨ និងថ្ងៃទី៩ ខែកក្កដា ក្រុមជួយសង្គ្រោះបានយកជនរងគ្រោះចំនួន ៩ នាក់ហើយចេញពីរូងភ្នំ Tham Luang។ មកដល់យប់ថ្ងៃទី១០ ខែកក្កដា សមាជិកចុងក្រោយនៃក្រុមបាល់ទាត់នេះត្រូវបានយកចេញទៅខាងក្រៅរូងភ្នំ។ ទទួលបានដំណឹងល្អនេះទាំងក្រុមសាច់ញាតិ និងក្រុមជួយសង្គ្រោះ ជាពិសេសប្រជាជនថៃ និងសហគមន៍អន្តរជាតិពិតជាសប្បាយរីករាយខ្លាំងណាស់។
យោងតាមក្រសួងសុខាភិបាលនៃប្រទេសថៃបានឱ្យដឹងថា ជនរងគ្រោះទាំងអស់ដែលត្រូវបានជួយសង្គ្រោះពីរូងភ្នំ Tham Luang មានសុខភាពល្អ។ ប៉ុន្តែគេសង្ស័យថាមានសមាជិកមួយចំនួនត្រូវឆ្លងមេរោគ។
លោកនាយករដ្ឋមន្ត្រីថៃ Prayut Chan-o-cha បានជូនពរចំពោះក្មេងៗដែលទើបបានជួយសង្គ្រោះនេះ ហើយបានថ្លែងអំណរគុណដល់ក្រុមអ្នកមុជទឹក។ នាយករដ្ឋមន្ត្រីថៃក៏បានស្នើឱ្យរដ្ឋាភិបាលជួយឧបត្ថម្ភ និងសំណងដល់កសិករក្នុងតំបន់ដែលបានសុខចិត្តឱ្យវាលស្រែរបស់ខ្លួនផ្ទុកទឹកដែលបានបូមចេញពីរូងភ្នំក្នុងអំឡុងនៃប្រតិបត្តិការជួយសង្គ្រោះនេះផងដែរ៕
បកប្រែដោយ Duy Hoan