ទីក្រុងហូជីមិញរំលឹកខួបលើកទី៤៥ នៃទិវាបង្កើតទំនាក់ទំនងការទូតរវាងវៀតណាម និងបារាំង
កប.អនឡាញ - នាថ្ងៃទី១១ ធ្នូ គណៈកម្មាធិការប្រជាជនទីក្រុងហូជីមិញ បានរៀបចំពិធីរំលឹកខួបលើកទី៤៥ ទិវាបង្កើតទំនាក់ទំនងការទូតរវាងវៀតណាម និងបារាំង (១៩៧៣-២០១៨)។ អញ្ជើញចូលរួមពិធីមានលោក Tran Vinh Tuyen អនុប្រធានគណៈកម្មាធិការប្រជាជនទីក្រុងហូជីមិញ និងលោក Vincent Floreani អគ្គកុងស៊ុលសាធារណរដ្ឋបារាំងប្រចាំនៅទីក្រុងហូជីមិញ។
បច្ចុប្បន្ន ប្រទេសបារាំងជាប់ចំណាត់ថ្នាក់លេខ១៦ ក្នុងចំណោមប្រទេស និងតំបន់ដែនដីចំនួន១០០ ដែលកំពុងមានគម្រោងវិនិយោគនៅទីក្រុងហូជីមិញ។ ទំហំពាណិជ្ជកម្មទ្វេភាគីទទួលបាន ៨៦៧ លានដុល្លារអាមេរិកនៅឆ្នាំ២០១៧ កិច្ចសហប្រតិបត្តិការលើវិស័យវប្បធម៌ អប់រំ បណ្ដុះបណ្ដាលក៏បានទទួលលទ្ធផលជាក់ស្ដែងផងដែរ។
លោក Tran Vinh Tuyen បញ្ជាក់ថា ទីក្រុងហូជីមិញមានបំណងចង់ជម្រុញថែមទៀតនូវទំនាក់ទំនងសហប្រតិបត្តិការលើវិស័យជាច្រើនជាមួយតំបន់នានារបស់បារាំង ជាពិសេសក្នុងវិស័យទប់ទល់នឹងការប្រែប្រួលអាកាសធាតុ ការអប់រំនិងបណ្តុះបណ្តាល ការអភិវឌ្ឍធនធានមនុស្សដែលមានគុណភាពល្អ និងជំនួបប្រាស្រ័យវប្បធម៌។ល។
លោក Vincent Floreani ក៏សង្កត់ធ្ងន់ថា កិច្ចសហប្រតិបត្តិការរវាងប្រទេសទាំងពីរទទួលបានសមិទ្ធផលជាច្រើនក្នុងវិស័យ វេជ្ជសាសស្រ្ត ឱសថសាស្រ្ត កសិកម្ម គ្រឿងបរិភោគ ហេដ្ឋារចនាសម្ព័ន្ធ និងបច្ចេកវិទ្យាខ្ពស់។ ទន្ទឹមនឹងនោះ ប្រទេសបារាំងរំពឹងនឹងទទួលនិស្សិតវៀតណាមថែមទៀត និងបន្តជួយគាំទ្រក្នុងការបង្រៀនភាសាវៀតណាម និងភាសាបារាំងនៅទីក្រុងហូជីមិញ និងបន្តរៀបចំកម្មវិធីផ្លាស់ប្តូរវប្បធម៌រវាងវៀតណាម និងបារាំងឲ្យបានច្រើនថែមទៀត៕
បកប្រែដោយ Thuy Anh