EIB ជួយផ្តល់ទឹកប្រាក់១៤៣ លានអឺរ៉ូដល់ទីក្រុងហាណូយដើម្បីសាងសង់ខ្សែរថភ្លើងទី៣
កប.អនឡាញ - នាថ្ងៃទី១០ មករា ក្នុងកិច្ចប្រជុំរវាងអនុប្រធានគណៈកម្មាធិការប្រជាជនរដ្ឋធានីហាណូយលោក Nguyen The Hung លោក Jonathan Taylor អនុប្រធានធនាគារវិនិយោគអឺរ៉ុប (EIB) ភាគី EIB បានឲ្យដឹងថា នឹងជួយផ្តល់ទឹកប្រាក់ប្រមាណ ១៤៣ លានអឺរ៉ូ ដល់រដ្ឋធានីហាណូយ ដើម្បីសាងសង់ខ្សែរថភ្លើងទី៣ (metro line 3) និងទិញរថភ្លើងថ្មីឲ្យខ្សែរថភ្លើងនេះ។
|
|
ធនាគារវិនិយោគអឺរ៉ុប (EIB) (រូបថត៖ Independent) |
ខ្សែរថភ្លើងនេះមានបណ្តោយ ១២.៥ គីឡូម៉ែត្រ ដោយមានស្ថានីយ៍រថភ្លើងចំនួន១២។ ខ្សែរថភ្លើងនេះនឹងកាត់បន្ថយវេលា និងចំណាយនានានៃការធ្វើដំណើរ ព្រមទាំងកាត់បន្ថយការបំពុលបរិស្ថានផងដែរ។
អនុប្រធានគណៈកម្មាធិការប្រជាជនរដ្ឋធានីហាណូយ លោក Nguyen The Hung មានបំណងថា វៀតណាមនឹងបន្តរួមដំណើរជាមួយ EIB ក្នុងគម្រោងផ្សេងៗ ជាពិសេសគឺជាគម្រោងទាក់ទងនឹងបរិស្ថាន។
លោកអនុប្រធាន EIB បញ្ជាក់ថា វៀតណាមគឺជាប្រទេសមានល្បឿនកំណើនយ៉ាងឆាប់រហ័ស។ ប៉ុន្តែ ការដោះស្រាយបញ្ហាចរាចរណ៍ និង ដឹកជញ្ជូនគឺជាបញ្ហាប្រឈមរបស់វៀតណាម និង រដ្ឋធានីហាណូយ។ ការអភិវឌ្ឍប្រព័ន្ធរថភ្លើងគឺជាវិធានការមួយដ៏ត្រឹមត្រូវនិងប្រសិទ្ធិភាព៕
បកប្រែដោយ Thuy Anh