កិច្ចប្រជុំស្តីពីកិច្ចសហប្រតិបត្តិការ និងអភិវឌ្ឍពាណិជ្ជកម្មនៅតំបន់ព្រំដែនវៀតណាម - ឡាវ
កប.អនឡាញ - តាមព័ត៌មានពីក្រសួងឧស្សាហកម្ម និងពាណិជ្ជកម្មវៀតណាមឲ្យដឹងថា កិច្ចប្រជុំស្តីពីកិច្ចសហប្រតិបត្តិការ និងអភីវឌ្ឍន៍ពាណិជ្ជកម្មនៅតំបន់ព្រំដែនវៀតណាម - ឡាវ លើកទី១១ បានប្រព្រឹត្តទៅនៅទីក្រុង Dong Hoi ខេត្ត Quang Binh ចាប់ពីថ្ងៃទី២៦ ដល់ថ្ងៃទី២៨ ខែកញ្ញា។
|
|
កិច្ចប្រជុំស្តីពីកិច្ចសហប្រតិបត្តិការ និងអភិវឌ្ឍពាណិជ្ជកម្មនៅតំបន់ព្រំដែនវៀតណាម - ឡាវ (រូបថត៖ baodansinh.vn) |
នៅកិច្ចប្រជុំនេះ តំណាងនៃក្រសួង ស្ថាប័ននានា និងសហគ្រាស នៃប្រទេសទាំងពីរបានថ្លែងបទអន្តរគមន៍ ដោយបានដាក់ចេញនូវសំណើជាច្រើន ដើម្បីភាគីទាំងពីរពិនិត្យពិចារណាលើវិធានការនានា ហើយបង្កលក្ខណៈងាយស្រួលសម្រាប់ការធ្វើពាណិជ្ជកម្មនៅតាមតំបន់ព្រំដែន នៃប្រទេសទាំងពីរ ឲ្យបន្តមានភាពរីកចម្រើនកាន់តែខ្លាំងក្លា នៅពេលខាងមុខ។
នៅចុងបញ្ចប់នៃកិច្ចប្រជុំនេះ ភាគីទាំងពីរបានចុះហត្ថលេខាលើអនុស្សារណៈយោគយល់គ្នារវាងក្រសួងឧស្សាហកម្ម និងពាណិជ្ជកម្មនៃប្រទេសទាំងពីរ ស្តីពីកិច្ចសហប្រតិបត្តិការក្នុងការអភិវឌ្ឍពាណិជ្ជកម្មនៅតំបន់ព្រំដែន។
នៅក្នុងក្របខ័ណ្ឌនៃកិច្ចប្រជុំនេះ ក្រសួងឧស្សាហកម្ម និងពាណិជ្ជកម្ម នៃប្រទេសទាំងពីរបានរៀបចំស្តង់តាំងបង្ហាញផលិតផលរបស់ប្រទេសទាំងពីរ ដើម្បីបង្ហាញណែនាំផលិតផលកសិកម្ម ផលិតផលសិប្បកម្ម ទំនិញប្រើប្រាស់ ដែលត្រូវបានផលិត និងបានដាំដុះដោយអ្នកវិនិយោគទុននៅតាមបណ្តាខេត្តដែលជាប់ព្រំដែន នៃប្រទេសទាំងពីរវៀតណាម និងឡាវ៕
បកប្រែដោយ Duy Hoan