វៀតណាម - កម្ពុជា ចុះហត្ថលេខាលើផែនការសហប្រតិបត្តិការសន្តិសុខឆ្នាំ២០១៩
កប.អនឡាញ - នាថ្ងៃទី១១ ខែមករា ឆ្នាំ២០១៩ នៅទីក្រុងហូជីមិញ ក្រសួងនគរបាលវៀតណាម បានរៀបចំកិច្ចពិភាក្សាការងារ និងចុះហត្ថលេខាលើផែនការសហប្រតិបត្តិការឆ្នាំ២០១៩ រវាងក្រសួងនគរបាលវៀតណាម និងក្រសួងមហាផ្ទៃ នៃព្រះរាជាណាចក្រកម្ពុជា។
លោកឧត្តមសេនីយ៍ឯក To Lam រដ្ឋមន្ត្រីក្រសួងនគរបាលវៀតណាម និងសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ នៃព្រះរាជាណាចក្រកម្ពុជា អញ្ជើញជាអធិបតីក្នុងកិច្ចពិភាក្សានេះ។
|
|
លោកឧត្តមសេនីយ៍ឯក To Lam និងសម្តេចក្រឡាហោម ស ខេង (រូបថត៖bocongan.gov.vn) |
ថ្លែងនៅឯកិច្ចប្រជុំមុនពេលចូលកិច្ចពិភាក្សា លោកឧត្តមសេនីយ៍ឯក To Lam បានសម្តែងនូវការសប្បាយរីករាយយ៉ាងក្រៃលែង និងវាយតំលៃខ្ពស់ចំពោះលទ្ធផលដ៏ល្អ នៃកិច្ចសហប្រតិបត្តិការយ៉ាងជិតស្និទ្ធ និងប្រកបដោយប្រសិទ្ធភាពរវាងក្រសួងនគរបាលវៀតណាម និងក្រសួងមហាផ្ទៃ នៃព្រះរាជាណាចក្រកម្ពុជា ក្នុងឆ្នាំ២០១៨។
លោកឧត្តមសេនីយ៍ឯក To Lam ឲ្យដឹងថា កិច្ចសហប្រតិបត្តិការរវាងក្រសួងនគរបាលវៀតណាម និងក្រសួងមហាផ្ទៃ នៃព្រះរាជាណាចក្រកម្ពុជាក្នុងឆ្នាំកន្លងទៅនេះ មានភាពរីកចម្រើនយ៉ាងខ្លាំងក្លា ជាពិសេសក្នុងការថែរក្សាសន្តិសុខ និងសណ្តាប់ធ្នាប់នៅតាមតំបន់ព្រំដែន ការសហការយ៉ាងជិតស្និទ្ធជាមួយគ្នា ដើម្បីទប់ស្កាត់ និងប្រយុទ្ធប្រឆាំងនឹងឧក្រិដ្ឋកម្មឆ្លងដែនគ្រប់ប្រភេទ ព្រមទាំងការបង្កលក្ខណៈងាយស្រួលដល់ប្រជាជននៃប្រទេសទាំងពីរក្នុងការចេញចូលព្រំដែន ធ្វើពាណិជ្ជកម្ម ក៏ដូចជាការបង្កលក្ខណៈងាយស្រួលសំរាប់អាណិកជនវៀតណាមឱ្យមានជីវភាពរស់នៅប្រកបដោយស្ថិតស្ថេរនៅតំបន់បឹងទន្លេសាបផងដែរ។
វាយតំលៃខ្ពស់ចំពោះសមិទ្ធិផលល្អៗនៃការអភិវឌ្ឍសេដ្ឋកិច្ច សង្គម ដែលវៀតណាមសម្រេចបានក្នុងឆ្នាំ២០១៨ និងលទ្ធផលល្អនៃកិច្ចសហប្រតិបត្តិការវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងនគរបាលវៀតណាម សម្តេចក្រឡាហោម ស ខេង បានស្នើឲ្យក្រសួងទាំងពីរបន្តពង្រឹងកិច្ចសហប្រតិបត្តិការឲ្យកាន់តែជិតស្និទ្ធ និងមានប្រសិទ្ធភាពថែមទៀត ដើម្បីរួមចំណែកសម្រេចបាននូវគោលដៅរួមរបស់រដ្ឋាភិបាលនៃប្រទេសទាំងពីរ នាពេលឆាប់ៗនេះ៕
បកប្រែដោយ Thanh Cong