កងទ័ពការពារព្រំដែនខេត្ត Binh Phuoc វៀតណាម និងតំបន់ប្រតិបត្តិការសឹករងខេត្តក្រចេះ រៀបចំកិច្ចពិភាក្សាប្រចាំឆ្នាំស្ដីពីកិច្ចសហប្រតិបត្តិការក្នុងការគ្រប់គ្រង និងការពារព្រំដែន
កប.អនឡាញ - នាថ្ងៃទី១២ វិច្ឆិកា បញ្ជាការដ្ឋានកងទ័ពការពារព្រំដែនខេត្ត Binh Phuoc វៀតណាម និងតំបន់ប្រតិបត្តិការសឹករងខេត្តក្រចេះបានរៀបចំកិច្ចពិភាក្សាប្រចាំឆ្នាំ ស្ដីពីកិច្ចសហប្រតិបត្តិការក្នុងការគ្រប់គ្រងការពារព្រំដែន និងផ្លាស់ប្ដូរព័ត៌មានអំពីសន្តិសុខសណ្ដាប់ធ្នាប់នៅតំបន់ព្រំដែនដែលគ្រប់គ្រងដោយអង្គភាពទាំងពីរ។
អញ្ជើញចូលរួមកិច្ចពិភាក្សា គណៈប្រតិភូកម្ពុជាបានដឹកនាំដោយលោកឧត្តមសេនីយ៍ទោ ណៃ តឹងឡឹង មេបញ្ជាការរងយោធភូមិភាគទី២ មេបញ្ជាការតំបន់ប្រតិបត្តិការសឹករងខេត្តក្រចេះ។ គណៈប្រតិភូបញ្ជាការដ្ឋានកងទ័ពការពារព្រំដែនខេត្ត Binh Phuoc ដឹកនាំដោយលោកវរសេនីយ៍ឯក Bui Minh Soai មេបញ្ជាការកងទ័ពការពារព្រំដែន។
|
|
ថ្នាក់ដឹកនាំអង្គភាពទាំងពីរចុះហត្ថលេខាលើអនុស្សារណៈយោគយល់គ្នា (រូបថត៖ bienphong.com.vn) |
ក្នុងឆ្នាំកន្លងមក អង្គភាពទាំងពីរបានពង្រីកកិច្ចសហប្រតិបត្តិការក្នុងការគ្រប់គ្រង និងការការពារព្រំដែន ផ្តោតទៅលើការផ្លាស់ប្តូរព័ត៌មានអំពីស្ថានភាពនៅតាមតំបន់ព្រំដែននៃភាគីទាំងពីរ។
ក្នុងកិច្ចពិភាក្សា ភាគីទាំងពីរក៏បានឯកភាពលើខ្លឹមសារនៃកិច្ចសហប្រតិបត្តិការនាពេលខាងមុខនេះ។ តាមនោះ ភាគីទាំងពីរនឹងបង្កើនការផ្លាស់ប្ដូរព័ត៌មានគ្នាទៅវិញទៅមកលើបញ្ហានានាដែលទាក់ទងនឹងសន្តិសុខសណ្ដាប់ធ្នាប់ ស្ថានភាពនៃឧក្រិដ្ឋកម្ម និងភេរវកម្មនៅតាមព្រំដែន និងសហការពិនិត្យការឆ្លងដែននៅច្រកទ្វារព្រំដែន ក៏ដូចជាបង្កលក្ខណៈងាយស្រួលឲ្យប្រជាជននៅតាមតំបន់ព្រំដែនក្នុងការលក់ដូរ និងការពិនិត្យជម្ងឺ។ ភាគីទាំងពីរនឹងបន្តជម្រុញការឃោសនា និងអប់រំឲ្យប្រជាជននៃប្រទេសទាំងពីរនៅតំបន់ព្រំដែនឲ្យមានការយល់ដឹង និងគោរពតាមកិច្ចព្រមព្រៀងស្ដីពីបទបញ្ញាតិព្រំដែន និងរក្សាទំនាក់ទំនងសាមគ្គីភាព ជិតស្និទ្ធរវាងប្រទេសទាំងពីរវៀតណាម និងកម្ពុជា៕
បកប្រែដោយ Thuy Anh