នាវានៃកងស្វ័យការពារជើងទឹកជប៉ុនអញ្ជើញមកបំពេញទស្សនកិច្ចនៅទីក្រុង Da Nang
កប.អនឡាញ - នៅថ្ងៃទី ៦ ខែមីនា នាវាហ្វឹកហ្វឺន JS Setoyuki និង JS Shimayuki នៃកងស្វ័យការពារជើងទឹកជប៉ុន រួមជាមួយនាយទាហាន និងនាវិកចំនួន ៣៩០ នាក់ ដឹកនាំដោយលោកវរនាវីឯក Nakagama Yoshiyuki មេបញ្ជាការអង្គភាពហ្វឹកហ្វឺនលេខ១ បានចូលចត់នៅកំពង់ផែ Tien Sa ចាប់ផ្តើមដំណើរទស្សនកិច្ចនៅទីក្រុង Da Nang (ភាគកណ្តាលវៀតណាម) ពីថ្ងៃទី ៦ ដល់ថ្ងៃទី ៩ ខែមិថុនា។
អញ្ជើញចូលរួមពិធីទទួលបដិសណ្ឋារកិច្ចនាវានៅកំពង់ផែ Tien Sa មានតំណាងនាយកដ្ឋានទាក់ទងបរទេស នៃក្រសួងការពារប្រទេសវៀតណាម បញ្ជាការដ្ឋានតំបន់ទី៣នៃកងទ័ពជើងទឹក និងឯកអគ្គរាជទូតវិសាមញ្ញ និងពេញសមត្ថភាពរបស់ជប៉ុនប្រចាំនៅវៀតណាម។
|
|
នាវាហ្វឹកហ្វឺន JS Setoyuki និង JS Shimayuki ចូលចត់នៅកំពង់ផែ Tien Sa |
តាមកម្មវិធីនៃដំណើរទស្សនកិច្ចនេះ គណៈបញ្ជាការនាវានឹងអញ្ជើញចូលជួបសម្តែងការគួរសមជាមួយថ្នាក់ដឹកនាំនៃគណៈកម្មាធិការប្រជាជនទីក្រុង Da Nang ថ្នាក់ដឹកនាំនៃបញ្ជាការដ្ឋានយោធភូមិភាគទី៥ និងថ្នាក់ដឹកនាំនៃបញ្ជាការដ្ឋានតំបន់ទី៣ កងទ័ពជើងទឹក។ នាយទាហាន និងនាវិកនៃនាវា នឹងចូលរួមការប្រកួតកីឡាបាល់ទាត់ជាមួយកម្មាភិបាល និងយុទ្ធជននៃបញ្ជាការដ្ឋានតំបន់ទី៣ កងទ័ពជើងទឹក ទៅទស្សនារមណីយដ្ឋានមួយចំនួននៅទីក្រុង Da Nang និងសម្តែងត្រែទ័ពនៅមហោស្រព Trung Vuong ។
ដំណើរទស្សនកិច្ចនេះរួមចំណែកក្នុងការជំរុញការផ្លាស់ប្តូរ ពង្រឹងកិច្ចសហប្រតិបត្តិការរវាងកងទ័ពជើងទឹកវៀតណាម និងកងស្វ័យការពារជើងទឹកជប៉ុន ក៏ដូចជាកិច្ចសហប្រតិបត្តិការលើវិស័យការពារជាតិទ្វេភាគីវៀតណាមជប៉ុនផងដែរ៕
បកប្រែដោយ Thanh Cong