វៀតណាម និងអាមេរិកសម្រេចគម្រោងបោសសម្អាតបរិស្ថានដែលត្រូវបំពុលដោយសារធាតុ dioxin នៅព្រលានយន្តហោះ Da Nang

អញ្ជើញចូលរួមពិធីមាន លោកឧត្តមសេនីយ៍ឯក Nguyen Chi Vinh អនុរដ្ឋមន្រ្តីក្រសួងការពារប្រទេសវៀតណាម លោក Daniel Kritenbrink ឯកអគ្គរដ្ឋទូតអាមេរិកប្រចាំនៅវៀតណាម និងតំណាង ស្ថាប័ន ក្រសួងនានានៃវៀតណាម និងអន្តរជាតិ។

លោក Nguyen Chi Vinh មានប្រសាសន៍ក្នុងពិធី

ក្នុងពិធីនេះ លោក Nguyen Chi Vinh និងលោក Daniel Kritenbrink បានអញ្ជើញធ្វើជាសក្សីក្នុងពិធីចុះហត្ថលេខាលើកិច្ចព្រមព្រៀងស្តី​ពី​ការ​ប្រគល់ផ្ទៃដីជាង ១៣ ហិកតាដែលត្រូវបានបោសសម្អាតគ្រាប់បែកមីន និងសារធាតុគីមីពុលនៅព្រលានយន្តហោះអន្តរជាតិ Da Nang ឲ្យ​ក្រសួងគមនាគមន៍ដឹកជញ្ជូនវៀតណាមគ្រប់គ្រង។

ពិធីនេះក៏ជារបត់មួយ​នៃការសម្រេចគម្រោងបោសសម្អាតបរិស្ថានដែលត្រូវបំពុលដោយសារធាតុគីមី dioxin នៅព្រលានយន្តហោះ Da Nang ដែលដំណើរការក្នុងរយៈពេល ៦ ឆ្នាំ ដោយភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ USAID សហការជាមួយក្រសួងការពារប្រទេសវៀតណាម។

ពិធីចុះហត្ថលេខាលើកិច្ចព្រមព្រៀងប្រគល់ផ្ទៃដីជាង ១៣ ហិកតាដែលត្រូវបានបោសសម្អាតគ្រាប់បែកមីន និងសារធាតុគីមីពុលនៅព្រលានយន្តហោះអន្តរជាតិ Da Nang

លោក Nguyen Chi Vinh បានសង្កត់ធ្ងន់លើការដឹកនាំរបស់បក្ស និងរដ្ឋវៀតណាម និងជំនួយពី​ក្រសួង ស្ថាប័ន និងមូល​ដ្ឋាន​នានា​របស់​វៀតណាម ក៏ដូចជាការខិតខំប្រឹង​ប្រែង​របស់​រដ្ឋាភិបាល និងប្រជាជនអាមេរិក និង​លោកឯកអគ្គរដ្ឋទូតអាមេរិកប្រចាំនៅវៀតណាម និង USAID  ក្នុងការបោសសម្អាតបរិស្ថានដែលត្រូវបំពុលដោយជាតិគីមី dioxin នៅព្រលានយន្តហោះ Da Nang នៅប៉ុន្មានឆ្នាំកន្លងមក។

យោងតាមលោកឯកអគ្គរដ្ឋទូត Daniel Kritenbrink រដ្ឋាភិបាលអាមេរិកនឹងបន្តជួយគាំទ្រវៀតណាមក្នុងការបោសសម្អាតសារធាតុគីមីពុល dioxin នៅព្រលានយន្តហោះ Bien Hoa វៀតណាម ព្រមទាំង នឹង​បន្ត​ពង្រីកទំនាក់ទំនងលើ​វិ​ស័យ​សន្តិសុខ ការពារជាតិ សេដ្ឋកិច្ច និងវប្បធម៌រវាងប្រទេសទាំងពីរ៕

បកប្រែដោយ Thuy Anh