វៀតណាមនិងសហព័ន្ធរុស្ស៊ីពង្រីកកិច្ចសហប្រតិបត្តិការលើវិស័យរក្សាសន្តិភាពនៃអង្គការសហប្រជាជាតិ
កប.អនឡាញ - នារសៀល ថ្ងៃទី១៤ មិថុនា នៅទីស្នាក់ការក្រសួងការពារប្រទេសវៀតណាម លោកឧត្តមសេនីយ៍ឯក Be Xuan Truong សមាជិកមជ្ឈិមបក្ស និងជាអនុរដ្ឋមន្រ្តីក្រសួងការពារប្រទេសវៀតណាមបានទទួលជួបគណៈប្រតិភូក្រសួងការពារជាតិសហព័ន្ធរុស្ស៊ីដឹកនាំដោយលោកឧត្តមសេនីយ៍ទោ Sergey Vasilievich មេបញ្ជាការរងកងទ័ពជើងគោកដែលកំពុងបំពេញទស្សនកិច្ចការងារនៅវៀតណាម។
|
|
លោក Be Xuan Truong ប្រគល់វត្ថុអនុស្សាវរីយ៍ជូនលោក Sergey Vasilievich |
ក្នុងឱកាសនេះដែរ លោក Be Xuan Truong បានបញ្ជាក់ថា នៅពេលកន្លងមក ទំនាក់ទំនងកិច្ចសហប្រតិបត្តិការលើវិស័យការពារជាតិរវាងវៀតណាម - សហព័ន្ធរុស្ស៊ីកាន់តែរីកចំរើន និងមានប្រសិទ្ធភាពជាក់ស្ដែង។
លោក Be Xuan Truong ស្នើថា ភាគីទាំងពីរបន្តបង្កើនការផ្លាស់ប្ដូរគណៈប្រតិភូយោធាគ្រប់ជាន់ថ្នាក់ ផ្លាស់ប្តូរព័ត៌មាន ចែករំលែកបទពិសោធន៍ និងសមត្ថភាពលើវិស័យរក្សាសន្តិភាពនៃអង្គការសហប្រជាជាតិ តាមរយៈការបង្វឹកបង្ហាត់ រៀបចំសិក្ខាសាលា សិក្សា និងផ្លាស់ប្តូររវាងអ្នកជំនាញការនៃប្រទេសទាំងពីរនៅពេលខាងមុខនេះ។
លោក Sergey Vasilievich បញ្ជាក់ថា ក្រសួងការពារជាតិរុស្ស៊ីនឹងជួយវៀតណាមក្នុងសកម្មភាពរក្សាសន្តិភាពនៃអង្គការសហប្រជាជាតិ ព្រមទាំងលោកលើកឡើងនូវការយកចិត្តទុកដាក់របស់រុស្ស៊ីចំពោះបទពិសោធន៍របស់វៀតណាមក្នុងការបំពេញភារកិច្ចរក្សាសន្តិភាពនៅស៊ូដង់ខាងត្បូង៕
បកប្រែដោយ Thuy Anh