វៀតណាមនិងសហព័ន្ធរុស្ស៊ីជម្រុញកិច្ចសហប្រតិបតិ្តការលើវិស័យបចេ្ចកទេសយោធា
កប.អនឡាញ - នារសៀលថ្ងៃទី២០ មេសា នៅទីស្នាក់ការក្រសួងការពារប្រទេសវៀតណាម លោកឧត្តមសេនីយ៍ឯក Be Xuan Truong អនុរដ្ឋមន្រ្តីក្រសួងការពារប្រទេសវៀតណាម និងជាប្រធានអនុគណៈកម្មការវៀតណាមនៃគណៈកម្មាធិការអន្តររដ្ឋាភិបាលវៀតណាម - សហព័ន្ធរុស្ស៊ីស្ដីពីកិច្ចសហប្រតិបត្តិការលើវិស័យបច្ចេកទេសយោធាបានទទួលជួបគណៈប្រតិភូសាជីវកម្មឧទ្ធម្ភាគចក្ររុស្ស៊ី ដែលដឹកនាំដោយលោក Boginskiy Andrey អគ្គនាយកនៃសាជីវកម្មមកជួបសម្ដែងការគួរសមក្នុងឱកាសបំពេញទស្សនកិច្ចការងារនៅវៀតណាម។
    |
 |
|
លោក Be Xuan Truong ទទួលជួបលោក Boginskiy Andrey |
ក្នុងឱកាសនេះដែរ លោកឧត្តមសេនីយ៍ឯក Be Xuan Truong សង្កត់ធ្ងន់ថា នៅពេលកន្លងមក ទំនាក់ទំនងភាពជាដៃគូយុទ្ធសាស្រ្តវៀតណាម - សហព័ន្ធរុស្ស៊ីមានការរីកចំរើន ក្នុងនោះមានទំនាក់ទំនងកិច្ចសហប្រតិបត្តិការលើវិស័យការពារជាតិ និងវិស័យបច្ចេកទេសយោធា។ លោកឧត្តមសេនីយ៍ឯក Be Xuan Truong បានវាយតំលៃខ្ពស់ចំពោះលទ្ធផលនៃកិច្ចប្រជុំរវាងគណៈប្រតិភូជាមួយស្ថាប័នមានសមត្ថកិច្ចមួយចំនួនរបស់ក្រសួងការពារប្រទេសវៀតណាមនៅពេលមុននេះ។ ព្រមទាំងលោកស្នើឲ្យភាគីទាំងពីរបន្តជម្រុញកិច្ចសហប្រតិបត្តិការសំដៅអនុវត្តការព្រមព្រៀងដែលបានចុះហត្ថលេខា រួមចំណែកក្នុងការពង្រឹង និងពង្រីកទំនាក់ទំនងកិច្ចសហប្រតិបត្តិការលើវិស័យការពារជាតិ បច្ចេកទេសយោធាឲ្យសក្តិសមនឹងទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយរវាងប្រទេសទាំងពីរ។
លោក Boginskiy Andrey បានឯកភាពជាមួយលោក Be Xuan Truong ហើយនិងចាត់ទុកថា ភាគីទាំងពីរគប្បីជម្រុញថែមទៀតនូវកិច្ចសហប្រតិបត្តិការលើវិស័យដែលភាគីទាំងពីរមានប្រៀបខ្លាំង៕
បកប្រែដោយ Thuy Anh