ចាប់ផ្តើមគម្រោងការអំពីកិច្ចសហប្រតិបត្តិការក្នុងការដោះស្រាយផលវិបាកដោយសារគ្រាប់បែក គ្រាប់មីន ដែលបន្សល់ទុកក្រោយសង្គ្រាម។
កប.អនឡាញ - នាថ្ងៃទី៩ ខែមីនា នៅទីក្រុង Dong Hoi ខេត Quang Binh (ភូមិភាគកណ្តាលនៃប្រទេសវៀតណាម) ស្ថាប័នប្រចាំរបស់គណៈកម្មការជាតិអំពីការដោះស្រាយផលវិបាកដោយសារគ្រាប់បែក គ្រាប់មីន និងសារធាតុគីមីពុលដែលបានបន្សល់ទុកក្រោយសង្គ្រាម (គណៈកម្មការដឹកនាំលេខ ៧០១) និងស្ថាប័នសហប្រតិបត្តិការអន្តរជាតិរបស់ប្រទេសកូរ៉េខាងត្បូង (KOICA) និងកម្មវិធីអភិវឌ្ឍន៍របស់អង្គការសហប្រជាជាតិ (UNDP) ចាប់ផ្តើមគម្រោងការ" វៀតណាម និងកូរ៉េខាងត្បូងសហប្រតិបត្តិការក្នុងការដោះស្រាយរាល់ផលវិបាកដោយសារគ្រាប់បែក គ្រាប់មីន ដែលបានបន្សល់ទុកក្រោយសង្គ្រាម”។
អញ្ជើញចូលរួមមានលោកឧត្តមសេនីយ៍ទោ Le Hien Van អនុប្រធានអគ្គស្នងការនយោបាយ និងជាអនុប្រធានស្ថាប័នប្រចាំនៃគណៈកម្មការដឹកនាំលេខ ៧០១ រួមជាមួយតំណាងក្រសួង ស្ថាប័ននានា និងថ្នាក់ដឹកនាំខេត្ត Quang Binh និងខេត្ត Binh Dinh ផងដែរ។
ថ្លែងក្នុងពីធី លោកឧត្តមសេនីយ៍ទោ Le Hien Van បានសង្កត់ធ្ងន់ថា គណៈកម្មការដឹកនាំលេខ ៧០១ និងក្រសួងការពារប្រទេសវៀតណាមវាយតំលៃខ្ពស់ចំពោះកិច្ចសហប្រតិបត្តិការរបស់ KOICA និង UNDP ក្នុងពេលកន្លងមក ព្រមទាំងសង្ឃឹមថានឹងបន្តទទួលបានការជួយឧបត្ថម្ភពីសហគមន៍អន្តរជាតិ ក្នុងការដោះស្រាយរាល់ផលវិបាកដោយសារគ្រាប់បែក គ្រាប់មីន ដែលបានបន្សល់ទុកក្រោយសង្គ្រាម រួមចំណែកក្នុងការធានាសន្តិសុខ សុវត្ថិភាពអោយប្រជាជនក្នុងការរស់នៅប្រចាំថ្ងៃ និងជំរុញការអភិវឌ្ឍសេដ្ឋកិច្ចសង្គមផងដែរ៕
បកប្រែដោយ Duy Hoan