កសាង និងអនុវត្ដផែនការដោះស្រាយផលវិបាកដោយសារគ្រាប់មីន និងសារធាតុគីមី
កប.អនឡាញ - នារសៀលថ្ងៃទី ១៩ មីនា ស្ថាប័នប្រចាំការនៃគណៈកម្មាធិការជាតិស្ដីពីការដោះស្រាយផលវិបាកដោយសារគ្រាប់មីន យុទ្ធភ័ណ្ឌមិនទាន់ផ្ទុះ និងសារធាតុគីមីក្រោយសង្គ្រាមនៅវៀតណាម (ស្ថាប័នប្រចាំការលេខ ៧០១) រៀបចំកិច្ចប្រជុំស្ដីពីការកសាង និងអនុវត្ដផែនការឆ្នាំ ២០១៨ និងកំណត់ទិសដៅដល់ឆ្នាំ ២០២០។ លោកឧត្ដមសេនីយ៍ឯក Nguyen Chi Vinh អនុរដ្ឋមន្ដ្រីក្រសួងការពារប្រទេសវៀតណាម និងជាប្រធានស្ថាប័នប្រចាំការលេខ ៧០១ អញ្ជើញជាអធិបតីក្នុងពិធីនេះ។ អញ្ជើញចូលរួមក៏មានតំណាងក្រសួង ស្ថាប័ននានាផងដែរ។
ក្រោយពីស្ដាប់របាយការណ៍របស់ការិយាល័យ ៧០១ នាយកដ្ឋានវិទ្យាសាស្ដ្រយោធា និងបណ្ដាអង្គភាព ស្ថាប័នពាក់ព័ន្ធ រួមទាំងការថ្លែងមតិក្នុងកិច្ចប្រជុំនេះ តាងនាមស្ថាប័នប្រចាំការលេខ ៧០១ លោកឧត្ដមសេនីយ៍ឯក Nguyen Chi Vinh សន្និដ្ឋានថា ក្នុងឆ្នាំ ២០១៧ កន្លងទៅនេះ ស្ថាប័នពាក់ព័ន្ធ និងអង្គភាពជាច្រើនក្នុងជួរកងទ័ព និងក្រៅជួរកងទ័ពបានសហការយ៉ាងជិតស្និទ្ធក្នុងការអនុវត្ដសេចក្ដីសម្រេចលេខ ៧០១ របស់នាយករដ្ឋមន្ដ្រីរដ្ឋាភិបាល - ប្រធានគណៈកម្មាធិការជាតិស្ដីពីការដោះស្រាយផលវិបាកដោយសារគ្រាប់មីន យុទ្ធភ័ណ្ឌមិនទាន់ផ្ទុះ និងសារធាតុគីមីក្រោយសង្គ្រាមនៅវៀតណាម។ នាយកដ្ឋានវិទ្យាសាស្ដ្រ -ការិយាល័យលេខ ៧០១ បានសម្រេចការរៀបរៀងឯកសារចំនួន ៥ ស្តីពីការចាត់តាំង និងបទបញ្ញត្ដិនៃគណៈកម្មាធិការជាតិ ស្ថាប័នប្រចាំការ និងការិយាល័យដាក់ជូននាយករដ្ឋមន្រ្តី និងប្រធានស្ថាប័នប្រចាំការចុះហត្ថលេខា ដើម្បីដាក់ដំណើរការជាផ្លូវការ។ ស្ថាប័នប្រចាំការបានផ្ដល់ប្រឹក្សាជូនថ្នាក់ដឹកនាំជាន់ខ្ពស់ និងបញ្ចូលខ្លឹមសារនៃការដោះស្រាយផលវិបាកដោយសារគ្រាប់មីន យុទ្ធភ័ណ្ឌមិនទាន់ផ្ទុះ និងសារធាតុគីមីក្រោយសង្គ្រាមចូលក្នុងសេចក្ដីថ្លែងការណ៍រួមរវាងវៀតណាមជាមួយសហរដ្ឋអាមេរិក ជប៉ុន អូស្ដ្រាលី និងអីុស្រាអែលៗល។
នៅកិច្ចប្រជុំ លោកប្រធានស្ថាប័នប្រចាំការបានស្នើឲ្យការិយាល័យលេខ ៧០១ បន្ដទទួលយកមតិយោបល់ពីប្រតិភូទាំងឡាយដើម្បីសម្រេចរបាយការណ៍លទ្ធផល ផែនការឆ្នាំ ២០១៨ និងកំណត់ទិសដៅដល់ឆ្នាំ ២០២០។ ទន្ទឹមនឹងនោះ លោកស្នើឲ្យស្ថាប័នពាក់ព័ន្ធ សមាគមជនរងគ្រោះដោយសារធាតុគីមី/ dioxin វៀតណាមត្រូវតែសហការយ៉ាងជិតស្និទ្ធជាមួយស្ថាប័នប្រចាំការលេខ ៧០១ និងស្ថាប័នពាក់ព័ន្ធ អង្គភាពនានាក្នុងការផ្ដល់ប្រឹក្សាអំពីការបំពេញរបបគោលនយោបាយ ជួយឧបត្ថម្ភផ្នែកសុខាភិបាល និងបង្កើនការងារធ្វើសម្រាប់ជនរងគ្រោះ៕
បកប្រែដោយ Thanh Cong