leftcenterrightdel
ទិដ្ឋភាពនៃពិធីទទួលបដិសណ្ឋារកិច្ចជាផ្លូវការសម្ដេច តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលអញ្ជើញមកបំពេញទស្សនកិច្ចជាផ្លូវការនៅវៀតណាម (រូបថត៖ chinhphu.vn)

 

នាព្រឹកថ្ងៃទី៧ ខែធ្នូ បន្ទាប់ពីពិធីទទួលបដិសណ្ឋារកិច្ចដែលត្រូវបានរៀបចំឡើងយ៉ាងឱឡារិកនៅរដ្ឋធានីហាណូយ នាយករដ្ឋមន្រ្តីវៀតណាម លោក Nguyen Xuan Phuc បានអញ្ជើញជួបចរចាជាមួយសម្ដេច តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

នៅក្នុងជំនួបនេះ ភាគីទាំងពីរ បានសម្ដែងការពេញចិត្តចំពោះការអភិវឌ្ឍជាវិជ្ជមាននៃទំនាក់ទំនងរវាងវៀតណាម និងកម្ពុជានាពេលកន្លងទៅ។ ថ្នាក់ដឹកនាំនៃប្រទេសទាំងពីររួមជាមួយក្រសួង ស្ថាប័ន អង្គការមហាជន និងខេត្ត ក្រុងនានា ជាពិសេសគឺខេត្ត ក្រុងដែល មានខ្សែព្រំដែនជាប់គ្នា បានរៀបចំជំនួបពិភាក្សាការងារ និងជំនួបប្រាស្រ័យយ៉ាងញឹកញ៉ាប់ ដែលរួមចំណែកលើកស្ទួយការជឿទុកចិត្តគ្នា និងភាពស្និទ្ធស្នាលរវាងភាគីទាំងពីរ។ ក្នុងឆ្នាំ២០១៨ ទំហំពាណិជ្ជកម្មទ្វេភាគីមានការលោតផ្លោះដ៏ធំធេង ដែលអាចសម្រេចបានចំនួន៤ពាន់៥រយលានដុល្លាអាមេរិកតាមការប៉ាន់ស្មាន។ វៀតណាមបន្តស្ថិតនៅក្នុងចំណោមប្រទេសចំនួន១០ដែលបណ្ដាក់ទុនជាច្រើនបំផុតនៅកម្ពុជា ដោយមានគម្រោងវិនិយោគជាង២០០និងដើមទុនសរុបជាង ៣ ពាន់លានដុល្លាអាមេរិក។ ភាគីទាំងពីរបានឯកភាពគ្នានឹងលើកកំពស់ប្រសិទ្ធភាព នៃកិច្ចសហប្រតិបតិ្តការផ្នែកការពារជាតិ សន្តិសុខ សំដៅការពារយ៉ាងរឹងមាំបរិយាកាសសន្តិភាព សន្តិសុខ និងស្ថិរភាពនៃប្រទេសនីមួយៗ។

leftcenterrightdel
នាយករដ្ឋមន្រ្តីនៃប្រទេសទាំងពីរវៀតណាម-កម្ពុជា

ក្នុងវិស័យពាណិជ្ជកម្ម នាយករដ្ឋមន្រ្តីនៃប្រទេសទាំងពីរបានអបអរសាទរចំពោះក្រសួងឧស្សាហ-ពាណិជ្ជកម្មវៀតណាម និងក្រសួងពាណិជ្ជកម្មកម្ពុជា ដោយបានសម្រេចការចរចាលើកិច្ចព្រមព្រៀងពាណិជ្ជកម្មតំបន់ព្រំដែន និងចុះហត្ថលេខាលើអនុស្សរណៈយោគយល់គ្នាស្ដីពីលទ្ធផលនេះ ព្រមទាំងសម្ដែងនូវជំនឿថា ទំហំពាណិជ្ជកម្មទ្វេភាគីនឹងសម្រេចបាននូវគោលដៅចំនួន៥ពាន់លានដុល្លាអាមេរិកយ៉ាងឆាប់ៗ ដើម្បីឆ្ពោះទៅរកគោលដៅខ្ពស់ៗថែមទៀតនាឆ្នាំ ២០២០។

ថ្នាក់ដឹកនាំទាំងពីររូបក៏បានឯកភាពគ្នាបង្កើនកិច្ចសហប្រតិបតិ្តការលើវិស័យអប់រំ បណ្ដុះបណ្ដាល កសិកម្ម រុក្ខកម្ម និងនេសាទ វប្បធម៌សិល្បៈ និងការជួបប្រាស្រ័យរវាងប្រជាជននៃប្រទេសទាំងពីរផងដែរ។

នាយករដ្ឋមន្រ្តីទាំងពីររូបបានឯកភាពគ្នាបន្តដោះស្រាយអោយបានល្អនូវបញ្ហានៅសេសសល់ដោយឈរលើស្មារតីមិត្តភាព និងការយល់ដឹងគ្នាទៅវិញទៅមក ជាពិសេសគឺបញ្ហាខ័ណ្ឌសីម៉ា និងបោះបង្គោលលើខ្សែព្រំដែនរួមរវាងប្រទេសទាំងពីរ សំដៅកសាងខ្សែព្រំដែនរួមប្រកបដោយសន្តិភាព មិត្តភាព ដើម្បីកិច្ចសហប្រតិបតិ្តការ និងវឌ្ឍនភាព។

ចំពោះបញ្ហាតំបន់ និងអន្តរជាតិនានា ថ្នាក់ដឹកនាំទាំងពីររូបបានឯកភាពគ្នាលើសារសំខាន់នៃការរក្សាសន្តិភាព ស្ថិរភាព និងសន្តិសុខក្នុងតំបន់ ព្រមទាំងអះអាងថា នឹងសហការយ៉ាងជិតស្និទ្ធដើម្បីបន្តកសាង និងអភិវឌ្ឍន៍សហគមន៍អាស៊ាន ជំរុញកិច្ចសហប្រតិបតិ្តការនៅតំបន់ត្រីកោណអភិវឌ្ឍកម្ពុជា-ឡាវ-វៀតណាម និងអនុតំបន់មេគង្គ សំដៅបង្រួញគម្លាតអភិវឌ្ឍ គ្រប់គ្រង និងប្រើប្រាស់ប្រភពទឹកនៃទន្លេមេគង្គប្រកបដោយចីរភាព ឆ្ពោះទៅរកគោលដៅអភិវឌ្ឍដោយចីរភាពរបស់អង្គការសហប្រជាជាតិផងដែរ។

បន្ទាប់ពីជំនួបចរចា នាយករដ្ឋមន្រ្តីវៀតណាមលោក Nguyen Xuan Phuc និងនាយករដ្ឋមន្រ្តីកម្ពុជា សម្ដេច តេជោ ហ៊ុន សែនបានអញ្ជើញជាសាក្សីក្នុងពិធីចុះហត្ថលេខាលើឯកសារសហប្រតិបតិ្តការមួយចំនួនក្នុងវិស័យគមនាគមន៍ដឹក​ជញ្ជូន ខ័ណ្ឌសីម៉ា​បោះ​បង្គោល​ព្រំដែន និងអប់រំ។ បន្ទាប់នោះ នាយករដ្ឋមន្រ្តីទាំងពីររូប បានអញ្ជើញជាសហអធិបតីនៅសន្និសីទកាសែតរួមដើម្បីជូនដំណឹងនូវលទ្ធផលនៃជំនួបចរចាទ្វេភាគីខាងលើ។

នាយករដ្ឋមន្ត្រីវៀតណាមលោក Nguyen Xuan Phuc បានចាត់ទុកថា ប្រទេសទាំងពីរនឹងសម្រេចលើសពីគោលដៅអំពីទំហំពាណិជ្ជកម្មទ្វេភាគី ៥ ពាន់លានដុល្លារអាមេរិកមុនឆ្នាំ ២០២០ ដោយឆ្ពោះទៅទំហំពាណិជ្ជកម្មច្រើនថែមទៀត។ នាយករដ្ឋមន្ត្រីវៀតណាមលោក Nguyen Xuan Phuc បានលើកច្បាស់ថា៖

"ខ្ញុំ និងសម្តេចតេជោ ហ៊ុន សែន បានឯកភាពគ្នាក្នុងការដាក់ចេញទិសដៅធំៗ ដើម្បីបន្តជំរុញទំនាក់ទំនងទ្វេភាគីតាមពាក្យស្លោក " ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់ជ្រុងជ្រោយ ស្ថិតស្ថិរឹងមាំយូរអង្វែង"។ យើងខ្ញុំអះអាងថា បន្តពង្រឹង និងពង្រីកទំនាក់ទំនងនយោបាយ រឹតបន្តឹងកិច្ចសហប្រតិបត្តិការលើវិស័យការពារជាតិ សន្តិសុខ ការពាររឹងមាំបរិយាកាសសុខសន្តិភាព សន្តិសុខ និងស្ថិរភាពនៃប្រទេសនីមួយៗ ប្រយុទ្ធប្រឆាំងឧក្រិដ្ឋជនឆ្លងដែន ក៏ដូចជារួមចំណែកដល់សន្តិភាព និងស្ថិរភាពក្នុងតំបន់។ ភាគីទាំងពីរបានសង្កត់ធ្ងន់ថា នឹងផ្តល់អាទិភាពខ្ពស់ និងខិតប្រឹងប្រែងដើម្បីសម្រេចបាននូវលទ្ធផលថ្មី ជាក់ស្ដែងក្នុងកិច្ចសហប្រតិបត្តិការលើវិស័យសេដ្ឋកិច្ច ដើម្បីនាំកិច្ចសហប្រតិបត្តិកាលើវិស័យសេដ្ឋកិច្ចក្លាយជាសរសរទ្រូងដ៏រឹងមាំនៃទំនាក់ទំនងរវាងប្រទេសទាំងពីរផងដែរ"៕

តាមvovworld.vn