ពិធីរំលឹកខួបលើកទី ១,០៥០ ឆ្នាំនៃរដ្ឋ Dai Co Viet
កប.អនឡាញ - កាលពីថ្ងៃទី ២៤ មេសា នៅតំបន់កេរ្ដិ៍ដំណែលប្រវត្ដិសាស្ដ្រវប្បធម៌នៅអតីតវាំង Hoa Lu ស្ថិតនៅឃុំ Truong Yen ស្រុក Hoa Lu ខេត្ដ Ninh Binh បានរៀបចំពិធីរំលឹកខួបលើកទី ១,០៥០ ឆ្នាំនៃរដ្ឋ Dai Co Viet (ឆ្នាំ ៩៦៨ - ឆ្នាំ ២០១៨)។ អញ្ជើញចូលរួមឱកាសនេះ មានវត្ដមានលោកអគ្គលេខាបក្ស Nguyen Phu Trong និងបណ្ដាថ្នាក់ដឹកនាំបក្ស រដ្ឋ ព្រមទាំងបណ្ដាអតីតថ្នាក់ដឹកនាំបក្ស រដ្ឋ ក៏ដូចជាតំណាងស្ថាប័នមជ្ឈិមផងដែរ។
|
|
លោកអគ្គលេខាបក្ស Nguyen Phu Trong និងប្រតិភូចូលរួមពិធី (រូបថត៖ vnanet.vn) |
ថ្លែងសុន្ទរកថានៅពិធីនេះ លោកស្រី Nguyen Thi Thanh លេខាបក្សខេត្ដ Ninh Binh បានរំលឹកឡើងវិញនូវគុណបំណាច់របស់វីរបុរស Dinh Bo Linh ដែលបានសម្រេចជោគវាសនាប្រវត្ដិសាស្ដ្រ គឺការវាយឈ្នះលើសត្រូវដើម្បីបង្រួបបង្រួមជាតិ បង្កើតឡើងរដ្ឋ Dai Co Viet។
តាងនាមឲ្យថ្នាក់ដឹកនាំបក្ស រដ្ឋ លោក Truong Hoa Binh ឧបនាយករដ្ឋមន្ដ្រីប្រចាំការនៃរដ្ឋាភិបាលមានប្រសាសន៍បញ្ជាក់ពីការប្រសូតចេញរបស់រដ្ឋ Dai Co Viet ដែលបានបើកចេញទំព័រប្រវត្ដិសាស្ដ្រថ្មីយ៉ាងត្រចះត្រចង់របស់ប្រជាជាតិ។ ព្រមទាំងលោកវាយតំលៃខ្ពស់ចំពោះសកម្មភាពរំលឹកខួបលើកទី ១,០៥០ ឆ្នាំនៃរដ្ឋ Dai Co Viet ដើម្បីរំលឹកឡើងវិញនូវប្រវត្ដិសាស្ដ្រជាប្រពៃណី របស់ប្រទេសជាតិ និងដឹងគុណដល់បុព្វបុរសដែលបានបង្រួបបង្រួមជាតិ និងបើកចេញសម័យឯករាជ្យជាតិ។
លោក Truong Hoa Binh កោតសរសើរចំពោះសមិទ្ធិផលទាំងឡាយដែលកងទ័ពនិងប្រជាជនខេត្ដ Ninh Binh សម្រេចបានក្នុងពេលកន្លងមក ក៏ប៉ុន្ដែនៅមានការលំបាក និងការប្រឈមជាច្រើនដែលទាមទារឲ្យបក្សភាគ អាជ្ញាធរដែនដីខេត្ដត្រូវតែលើកកម្ពស់លទ្ធភាពដឹកនាំបញ្ជា និងការគ្រប់គ្រងរដ្ឋឲ្យមានប្រសិទ្ធភាព ការផ្លាស់ប្ដូរជារចនាសម្ព័ន្ធសេដ្ឋកិច្ច អភិវឌ្ឍន៍វិស័យទេសចរណ៍ បច្ចេកវិទ្យាទំនើប ដើម្បីលើកកម្ពស់ប្រាក់ចំណូលសម្រាប់ប្រជាជនខេត្ដ Ninh Binh ហើយនិងការកំណែទម្រង់បែបបទរដ្ឋបាល ដើម្បីទាក់ទាញទុនវិនិយោគពីបរទេស ជាពិសេសគឺការការពាររក្សាវប្បធម៌ អប់រំ និងបេតិកភ័ណ្ឌវប្បធម៌អតីតរាជវាំង Hoa Lu ផងដែរ៕
បកប្រែដោយ Thanh Cong